Home 多平台 手機 Android 新作有無伏?《Puzzle Fighter》詳盡試玩!
新作有無伏?《Puzzle Fighter》詳盡試玩!

新作有無伏?《Puzzle Fighter》詳盡試玩!

0
0


正當每個人都玩緊火紋無雙同Fifa之際,突然手機遊戲《Puzzle Fighter》就殺咗出黎。明明喺街嘅筆者決定Download 呢款遊戲,試一試到底係舊酒新瓶,定係掛羊頭賣狗肉。(唔好問我點解兩個形容詞都咁負面,因為老實講,舊Game變成手機版多半都死得好淒厲)。

 

 

首先我先前設大家都有玩過舊作,因為如果無玩過我只能同你講你都係入Game玩啦,單獨睇呢套絕對係好遊戲,而今次主要同大家講一講今次遊戲到底被改成點,同埋作為舊作玩家嘅玩後感。

入Game之前,如果你細個係玩《Super Puzzle Fighter II Turbo》 大,你可能對遊戲畫風會有些少意見,雖然角色方面係採用美式Q版,亦少左以往遊戲中角色搞鬼互動,但遊戲玩法上就絕對係Base On以前隻Game Develop上去。

今次遊戲玩法上同原作類似,玩家一樣要用唔同嘅Gem組合,再運用圓形珠珠將其扣減,將對方角色KO,但今集玩法就不再單單是令對方嘅磚塊砌到頂繼而「閂閘」,而係運用特定Gem組合,令角色使出絕招,將對方血量扣光KO。

今集每位角色除咗同以往一樣,每位角色都有特定嘅「落磚」punish 格式,今次每個角色亦可以配上兩招技能。例如阿龍可以將4格大Gem消除使出波動拳,6格大Gem消除使用昇龍拳。每一個技能都有相應攻擊力,而角色亦有「屬性」,以顏色去分,如果消除的Gem是自己的屬性更會有bonus攻擊力。去到消除一定的Gem之後,角色更可以使用「超必殺技」,對敵人大幅扣血!

 

▲唔同角色對應不同屬性會有能力提昇

 

作為手機遊戲,課金系統當然少不了,遊戲系統除咗角色之外,最重要就係抽取「技能卡」提昇招數攻撃力。就如《Clash Royale》一樣,玩家同其他玩家對戰取勝之後就可以抽箱 (其實係E 本田嘅壽司船,不過抽箱大家一睇就明我講乜),箱入面會有不同稀有度嘅技能卡以及金錢。

 

▲肥仔本田嘅壽司船真係無幾可有好野

 

 

要開箱除咗打嬴敵人之外,遊戲亦會有任務系統,打嬴一樣有箱開。任務唔同難度,玩家打嬴之後可以拎到箱同埋「MP」,儲夠一定「MP」仲可以拎到活動限定箱,分分鐘有角色又或者其他稀有服裝(無錯,呢隻Game係有服裝架)。任務每日會更新,所以都唔可以狂刷任務拎錢拎獎勵架。

 

▲拎夠1500mp就可以開箱架喇!


遊戲玩法同系統大約就係咁,但係玩落又點樣呢?我自己就實測足一日,始終自己係舊系列Fans,對呢款遊戲本身都幾期待嘅,但係玩落又係唔係呢回事呢?咁我緊係可以答你,其實係完全兩款遊戲啦。

以往大家玩法好可能係儲大Gem、堆Combo,等對方時限磚差唔多可以Unlock 時就再補一層,直到對方「閂閘」;但係我自己玩落,認為今集遊戲玩法以「扣血」為先,以配合角色技能嘅顏色同Gem 組合Combo,向對方出技就係今集主要元素。

 

▲技能系統令遊戲玩法大大改變,嬴左有獎仲可以升RANK

 

以前大家可能會儲一舊大大嘅Gem,令對方有壓力;但今集遊戲入面,玩家反而更加需要了解自己角色嘅技能,而唔係阻止對方消除大Gem,所以玩落相對就無咁需要玩家留意對方版面動向,令舊作玩家有點失望。

其次遊戲初期對人戰,需要玩家先打10局才可以Unlock 兩個partner 位置,Partner 會提高玩家攻擊力,所以除非你本身係高手高手高高手(而或者課咗金),如果唔係頭10局你唔係好好運抽到同你同級嘅對手的話,其實都係挨打,所以作為新手階段,呢個位都真係幾趕客。

 

▲唔同技能配合可以有唔同打法,有攻擊有回血,各有特色

 

再者新手階段技能攻擊力唔高,如果大家係抱住舊作Concept咁打,真係慘過食兩舊屎,初試玩時候我同另一位對手都係狂砌大Gem,最後打足3~4分鐘都未分勝負,不過遊戲會隨住Gametime慢慢加快,去到最後邊個頂唔順,Gem上到頂嘅一樣會Gameover。

 

▲乖乖地出多兩野絕招對面就好快死架喇

 

雖然上面係咁講,但係單純當新Game 黎睇,遊戲節奏係爽快嘅,比起舊作,遊戲時間亦變得更短更刺激,雖然唔會好似以前咁砌一舊8×8嘅超級大磚,但係估對方點配技,又或者睇準時間落Punish時限磚亦成為咗遊戲關鍵,在於一個時間短嘅手機遊戲,我個人覺得都收貨嘅。

老實講,如果你係抱住要玩到舊作水平嘅心態,呢款遊戲就一定唔係嗰回事架喇,始終你要拎住部電話咁專心咁砌磚,喺屋企就可能玩得掂;今次手機版加入唔少手機遊戲元素,令手遊玩家提高對遊戲興趣嘅持續性,同時簡化遊戲,令大家可以邊行邊玩。所以如果單獨去睇呢款遊戲,佢嘅可玩性同埋趣味都高嘅,而且亦有唔少Capcom 常見角色,最重要係遊戲唔痴身,唔駛三兩個鐘就入黎清一次體力又或者打任務,如果單純想搵隻Game 可能坐車玩,呢款《Puzzle Fighter》絕對值得一戰。


遊戲名稱:《Puzzle Fighter》

遊戲類型: 智力拼圖

開發: Capcom

平台: ios/an

推出日期: 已推出


最新討論

comments